Sat. Aug 15th, 2020

لیڈرشِپءُ ربیت شناسی: امین ضامن بلوچ

1 min read

لیڈرشِپءُ ربیت شناسی
Traditionalism and Leadership
امین ضامن بلوچ

ہما جُنز یا موومنٹ کہ جَہل ءَ چہ چِست بنت، ما ایشاں رُستگیں جُنز گُشیں۔ رُستگیں جُنز ءِ تہا لیڈرشپ ءِ ضرورت حاصیں وڑے ءَ نہ بیت۔۔ چونائی ءَ اے دائما وتی ستک ءُ عقیدہاں گوں چاگرد ءُ ماحول ءَہمدپ ءُ ہمسَنگ کنگ لوٹ اَنت اے بنیاد ءَ اے دیمروی پسند گُشگ بنت پہ دیمروی ءَ اگاں اے یک لیڈر یا لیڈر شِپ ءِ سرا حیال ءَ گوْر بکن اَنت، گڑا لیڈر ءِ زوال ءَ پَد جُنز ہم زوال ءَ کپیت۔ رُستگیں جُنزانی تہا اے ہر یک باسکے ءَ اَنچو تیار کن اَنت کہ وہد ءِ حساب ءَ کسے ہم جُنز ءِ رہشونی ءَ کُت بکنت۔ اے وڑیں جُنز وتی فطرت ءُ نوعیت ءِ تہا ربیت شناس بیت البتہ وتی معاشی رَندگیری ءَ ایشی ءِ نوعیت سرمایہ ءِ لفٹ ءُ رائٹ ءِ تہا بدل بیت۔ ربیت شناس ءِ گوْرا زند ربیت ءِ ہمرائی ءِ بنیاد ءَ معروضی بیت ، البتہ ایدگرانی گوْرا زند معاشی عمل ءِ پیلوی ءِ درگت ءَ ہما وہد ءَ معروضی بیت وہدے انسان پہ وتی بقاءَ یک معروضی معاشی نظامے ءِ رِد ءَ زند ءَ بُگوْازینیت


اگاں ما نگاہ یے پہ بنیاد شناساں بداریں گڑا زانگ بیت کہ آہانی گوْرا لیڈر شِپ ءَ مزنیں بستارے حاصل اِنت،پرچاکہ بنیاد شناس گوْستگیں دؤر ءَ پدا زندگ کنگ لوٹ اَنت۔ چو کہ دیمروی ءِ عمل ءَ گوں کسے ہم شُت کنت(ہمراہ بوت کنت) پرچا کہ وہد ءِ گوْزگ وَ فطری اِنت، بلئے وہد ءِ پَد ءُ دوبر آہگ فطری نہ اِنت

وہد ءِ پدا آہگ بزاں گوْستگیں دؤر ءِ پدا زندگ کنگ ہرکسی کار نہ بیت، ہما کہ سرجمیں جُنز ءَ رہشونیت، ہما اے کار ءِ رپک ءَ سرپد بیت۔ چو کہ بے فطری بوہگ ءَ گوں اے پیچیدہ بیت ءُ مان گیشّیت، ءُ اے وڑا ایشی ءِ دُراہیں تکنیک موضوعی بنت اے درگت ءَ ہما رپک ءِ واہند اِنت آ لیڈر بیت وہدے آ زوال بیت گڑا اے موضوعی تکینک ہم ہمائی ءَ گوں سفر کن اَنت۔ پہ زوال ءِ رکگ ءَ مہلوک ءَ پدا ہمیشی ءِ وڑیں مردے درکار بیت۔ اے درگت ءَ گیشتر وہد ءَ ہمے زوال کپتگیں مردم ءِ نزیکیں مردمے پہ اے کار ءِ سرجم کنگ ءَ نامینگ بیت۔ چو کہ تکنیک وتی نوعیت ءِ تہا موضوعی بوتگ اَنت، لہٰذا اے نوکیں مردم سَتر زور بہ جنت بلئے ہمائی ءِ رنگ ءَ نیئت۔ راجدپتر ءِ تہا ماگندیں کہ یک بنیاد شناسیں لیڈرے ءِ زوال ، کہ سرجمیں جُنز ءِ رہشون اَت، تیوگیں جُنز ءِ مَرگ گُشگ بیت


بنیاد شناسانی جنز رُستگیں جنزے نہ اِنت، بلکیں ما ایشی ءَ دْرنجتگیں جنز (بزاں بُرز ءَ اتکگیں جنز) گُشیں، اے جنز زاہر ءَوتی یک معروضی مقصدے اڑ کنت ءُ پدا ہما مقصد ءِ پیلو کنگ ءِ واستہ مردم جوڑ کنت۔ اے درگت ءَ ایشانی گوْرا لیڈر شِپ ءِ سک باز ارزشت بیت کہ پہ مقصد ءِ پیلوی ءَ مردم جوڑ کن اَنت۔ اے جنز چیز ءَ ارتقا ءِ رِد ءَ روا بوہگ ءُ ردوم گِرَگ ءَ نیلنت۔ ایشانی حیال اِنت کہ ارتقا ءِ پروشگ بدلی ءِ نشانی اِنت۔ارتقا ہما وہد ءَ پْرشیت وہدے اتھارٹی پروشگ بہ بیت۔ دانکہ بُرز ءَ چہ دَزمانجنی نہ کنئے گڑا بدل نیئت۔ اے مردم راجمان ءِ نام نہادیں گِہتری ءِ واستہ ہم ہمے وڑ جیڑ اَنت۔ بنیاد شناسانی وڑا ایشانی ہم لیڈر شِپ کُجام ہم سببے ءَ مقصد ءَ چہ کنارہ بکنت یا زوال بہ بیت یا بہ مریت گڑا سرجمیں جنز ہاکاں کپیت


اے گپ زانگ لوٹیت کہ دُراہیں بنیاد شناس دْرنجتگیں جنز ءِ تہا شُمار بنت بلے دْرنجتگیں جنز بنیاد شناسی ءِ تہا شُمار کنگ نہ بیت۔ بنیاد شناس ءُ دْرنجتگیں جنز ءِ میان ءَ لیڈر شِپ ءِ ہمرنگیں خصوصیات اِیش اَنت


لیڈر وتا واک ءُ اختیارانی بُنزہ ءُ منبع حیال کنت:۱
لیڈر دائما وتی باسکاں چہ کاملیں وفا ءِ اُمیت کشیت : ۲
وہدے کسے لیڈر بیت آ ہم جنز ءَ وتی وڑا کار گِریت :۳


بنیاد شناسیں لیڈر وتی ہر مفاد ءَ چو کہ آئی ءَ موضوعی تکنیک ءِ بنیاد ءَ بستگ ، ایدگہ ایشاں آ وڑ زانت نہ کن اَنت بنیاد ءِ محکم دارگ ءِ ٹہکار یا حکمت عملی یے گُشیتءُ مہلوک ءَ وتی راہ ءَ کاریت۔ دْرنجتگیں جنز ءِ لیڈر وتی مفاد ءِ بنیاد ءَ وہدے سیاسی رنگ ءَ باج بارت گڑا اے بلند پاسی ءَ بدلی یے گُشیت ءُ مہلوک ءَ وش کنت کہ اے بدلی ءِ بنزہ مئے یکمُشتی اِنت

Leave a Reply

Your email address will not be published. Required fields are marked *

NODARBAR Social

Copy link
Powered by Social Snap