Thu. Feb 27th, 2020

بلوچ اسٹوڈنٹس ایکشن کمیٹی کراچی یونیورسٹی یونٹ ءِ مروچگیں دیوان

1 min read

بلوچ اسٹوڈنٹس ایکشن کمیٹی کراچی یونٹ ءِ مروچگیں دیوان ءِ ھال
رمز : 10 جنوری 2020
بلوچ اسٹوڈنٹس ایکشن کمیٹی کراچی یونیورسٹی ءِ یونٹ ءَ نوکیں سال ءِ اولی دیوان چَہ مروچی دوبر بندات کُتگ۔ دیوان دو بھر ءِ تَھا بوتگ اولی بھر گپ ءُ تران یا گوشتانکی بھر ءَ گوں دیوان بندات کنگ بوتگ۔ تران کنوکیں مہمان واجہ شرف شاد ءُ بانک زاہدہ رئیسی ءَ “بلوچی زبان ءِ ارزشت ءُ بلوچی زبان ءِ وانگ ءُ دربرَگ” ءِ سرءَ وتی ھیال ءُ لیکہ درشان کُتگ ۔ دیوان ءِ دومی بھر ءَ نوک اتکگیں نودربر ءُ بلوچی سرٹیفکٹ کورس ءِ چکاس ءَ پوزیشن گپتگیں نودربراناں کتابانی سوگات دیگ بوتگ ۔

دیوان ءِ بندات ءَ واجہ شرف شاد ءَ بلوچی زبان ءِ ارزشت ءِ بُن گپ ءِ سرءَ گپ تران کنان ءَ گُشت:
”بلوچی زبان ءِ ھرچ رنگ ھزمت بوت کنت۔ بِلّے کسے بلوچی وانگ نہ زانت بلے بلوچی ءَ گپ جنت اے ھم ھزمت انت ، بلوچی کتابے ءَ پَہ بہاہ زورگ ھم پہ بلوچی زبان ءَ ھزمتے ۔
ما سوشل میڈیا ءَ گپ کنیں، نبشتہ کنیں بائدیں ما ھمے گپ ءُ تران ءُ نبشتھاں ماں بلوچی زبان ءَ بکن ایں ءُ جُھد بہ کن ایں کہ زگریں بلوچی ءَ بکن ایں کہ اے رنگ ءَ مئے زبان دیمروی کنت۔
ما گیشتر وتی مارشت ءُ ھیالاں ماں انگریزی زبان ءَ نبشتہ کن ایں بلے اگاں ھمے انگریزی گپان ما گوں رجانک ءَ بدائیں تہ زبان ءَ مزنیں پائدگے رس ایت ءُ ھمے رنگ ءَ زبان میزان میزان ءَ دیمروی ءِ منزل ءَ جُنزان کنت۔
مروچیگیں دور کمپیوٹرءِ دور اِنت بلے ما ھمنچو پَشت کپتگیں کہ اگاں ما گوگل ءَ مُلا فاضل ءُ عطا شاد ءِ سرا چیزے سرچ بہ کنیں تہ مارا ایوک دو ءُ سے ارٹیکل ءَ ابید ھچ دست نہ کپ انت۔ بحیثیتِ نودربر اگاں ما وت نبشتہ کُت نکیں بلے کم از کم انچو کُت کنیں کہ دگرے ءِ آرٹیکل ءَ ٹائپ بہ کنیں ءُ گوگل ءَ یا ایندگہ ویب سائٹ ءَ بہ دئیں بزاں ما وتی زبان ءَ پائدہ دیگ ءَ ایں ۔اے راجانی زمہ واری اِنت کہ آ وتی زبان ءَ دیمروی دینت ، وتی شاعر ءُ گلوکاراں دوست دارنت وتی کتاب ءُ ادیباں دوست دارانت۔
کراچی یونیورسٹی ءَ بلوچی سرٹیفکٹ کورس ءِ رنگ ءَ مارا اگاں اے موکایے رس اتگ کہ ما یک کلاکے وتی زبان ءَ بوان ایں ءُ در بہ برئیں گُڑا بائدیں پہ وتی زبان ءِ ھزمت ءَ مارا اے موکا یل دیگی نہ اِنت ءُ گیش ءَ چہ گیش ایشی ءِ تھا بھر زورگی اِنت ءُ وتی کچ ءُ کساس ءَ زبان ءِ دیمروی ءِ ھاترا وتی بَھر مان کنگی اِنت۔

دیوان ءِ دومی مھمان بانک زاہدہ رئیس راجی ءَ بلوچی زبان ءِ ارزشت ءِ سرءَ وتی ھیال ءُ لیکہ اے رنگ ءَ اِیر کُت اَنت ءُ گُشت:
ھرھما راجے کہ دیر چار بیت انت آ مُدام انچیں گام گیج زورایت کہ آئ ءِ آیوکیں پدریچ ءَ دیمروی یا ترقی ءِ رَھبند ءِ نشان ءَ بِہ دنت ۔ بلوچانی مزنیں کساسے کراچی ءَ چَہ مُلک ءِ جوڑ بوھگ ءَ پیسرءَ ادءَ جھمنند اِنت ءُ چَہ ھما وھد ءَ بلوچی ءَ ھبر کنگ ءَ اِنت
کہ کراچی ءَ بلوچانی مزنیں آبادی یے زندگی کنگ ءَ اِنت ءُ چَہ ھما زمانگ ء َکہ پاکستان نہ بیتگ بلوچانی مزنیں رئیت یے ھمے شھر ءَجاہ منند بیتگ ءُ چہ ایشاں گیشتریں مردم چَہ ھما زمانگ ءَ بلوچی ءَ گپ جنگ ءَ اَنت بلے ادءِ مزن شاہ دربرجاہ ءَ بلوچی ڈیپارٹمنٹ ءِ نہ بوہگ سوب چی اِنت ءُ پرچا ایوک ءَ سرٹیفکٹ کورس وانینگ بوھگ ءَ اِنت۔

راج ھما وھد ءَ مانیت کہ آئی ءِ زبان بہ مانیت، زبان راجانی پجّار اِنت کہ آئی ءَ مدام اَست کنت۔ ما اگاں میان استمانی دیمروی ءِ سبب ءَ بہ چاریں گڑا اے آیانی زبان اِنت کہ آیاناں مالی ءُ معاشی ھروڑیں نپ داتگ ئِے۔ زبان راجاں جوڈ ہم کنت ءُ پروشت ہم کنت۔
سندھیاں وتی زبان انچوش مُھر داشتگ کہ سندھ ءِ توک ءَ سندھی زبان سندھ ءِ اولی زبان اِنت کہ آئ ءِ توک ءَ وانگ ، باپار ءُ سرجمیں چست ایر بنت ءُ دومی زبان ءِجھت ءَ اردو اِنت۔ اے ھمے راجانی بود اِنت کہ وتی زبان ئِے پھریزاتگ ۔ پمشکہ مروچی سندھی زبان ءَ نے اردو پروشت کنگ ءَ انت ءُ نے انگریزی۔
مئے بد بھتی اِنت کہ ما ھر کجا شُتگیں وتی زبان یل داتگ ءُ دومی زبان ءَ ھبر کنگ بندات کُتگ ایں۔ چہ ایشی ءَ تاوان اے رس اتگ کہ زبان ءِ یل دیگ ءَ رند پُچ ءُ پوشاک پدءَ دود ءُ دودمان ھم مٹینتگ ءُ درور مارا سندھی گپ جنوکیں بلوچانی گورءَ ھم دست کپ ایت ءُ سرائیکی گوشوکیں بلوچانی گورءَ ھم ۔
اگں ما تاریخ ءَ بہ چاریں انگریزی یا انگلو جرمنی ءِ گالوار( لہچہ ) یے بیتگ بلے انگریزی زبان ءَ ھمنچو دیمروی کُت کہ مروچی انگریزی کُلیں دنیا ءَ ھکمرانی کنگ ءَ اِنت۔ بلوچی زبان شھدربرجاہ ءَ برگ ءِ کہ جُھد بیت انت گُڑا بلوچی زبان الم دیمروی کنت ۔۔
دیوان ءِ دومی بھر ءَ نوک اتکگیں بلوچ نودربراناں بلوچ کتاب سوگات کنگ بوتگ ءُ بلوچی سرٹیفکٹ کورس ءِ چکاس ءَ پوزیشن گپتگیں نودربراں ھم بلوچی کتاب سوگات کنگ بوتگ۔
اولی پوزیشن ملگزار بلوچ، دومی پوزیشن سمیر مزار ءُ عمران الہیٰ ءُ سمی پوزیشن وحید عباس، شمیمہ بلوچ، جوہر بلوچ ءُ دیدار بلوچ ءَ گپتگ ۔

دیوان ءِ گُڈ سرءَ بلوچ اسٹوڈنٹس ایکشن کمیٹی کراچی یونٹ ءِ صدر زبیر قومی ءَ درائیں مہمان ءُ نودربرانی منتواری گپتگ ءُ بلوچی سرٹیفکٹ کورس ءِ تھا بھر زورگ ءِ سکین داتگ ءُ دیوان ءِ ھلاسی ءِ جار جتگ۔
بلوچ اسٹوڈنٹس ایکشن کمیٹی کراچی یونٹ

Leave a Reply

Your email address will not be published. Required fields are marked *

NODARBAR Social

Copy link
Powered by Social Snap